COMO ME ASALVI DEL HOLOCAUSTO ?

En kombatindo se,  par Zamila Kolonomos, partisana.    Testimonio de una luchadora en la resistencia en los Balcanes, publicado en el número 32 de la  Lettre Sépharade.


DJamila Andjela Kolonomos (Monastir, 1922-Skopje, 2012) Su padre, Isak, era hijo de Esterina Casorla (Cazorla) y Kalef Kolomonos, de Yoánina, en el Epiro (cerca de la frontera con Albania)  Su madre, Djamila Fransez, de Skopje. Isak era el director del banco franco-serbio en Monastir.

El 6 de abril de 1941 los nazis invaden Grecia y la extinta Yugoslavia.  Durante los primeros días de la ocupación alemana, Isak fue denunciado por un  empleado del banco ante las autoridades alemanas;  lo obligaron a abrir la caja fuerte  y confiscaron  todoel dinero y los documentos que contenía.

Djamila, que pertenecía a Ha´Shomer ha´Tzaír, se unió a la Resistencia contra el Fascismo. De zapatera pasó a repartidora de armas y luego organizadora de pequeños grupos clandestinos de mujeres. Junto con otras dos compañeras se salvó de milagro de la deportación masiva a los almacenes de una taacalera, de donde partieron luego para Auschwitz. Se tiraron al monte y Djamila fue nombrada comisaria. Esta es su historia , contada por ella misma:


Djamila, primera de tu derecha, con Luna y Zvik. El es Yosef Kimji, primer y último presidente de la comunidad judía de Monastir tras la guerra

Mi padre fuej denonsado a la komendensya almana ke komo direktor de la banka Franko-Serbe es Djidyo. Dos soldados almanes lo tomaron en kaza, lo ovligaron de avrir la kasha del banko, tomaron las paras i otros byenes. Mos alegrimos kuando lo vimos atornar. Mi madre se moryo un mes antes el empesijo de la gera. Mi ermana Bela stava despozada kon Mois Kasorla. Fujendo de Belgrad delantre de los Almanes se instalo a Skopye i se kazaron. La polisiya no mos dyo permisyon i no asistimos a la boda. Aviya ley ke era defendido a los Djidyos de viyajar i de salir de la sivda. Mis ermanos Kalef i Menahem nos les permetyeron kontinuar las eskolas i empesaron a ambizar ofisyo, komotoda la manseves djudiya. Mi ermanika Rashel i yo tambyen kedimos en kaza ambezando a kozir kamizas i kuydar a mi nona Djamila ke estava tumada, le aviya kayido la gota.

La rezistensya kontra il fashizmo stuvo organizada kon la unika organizasyon, el partido komunista. Los Djidyos no teniyan kualo skujer. Si arimaron al partido ke organizo la rezistensya. La majorita di la manseves stavanos organizados al Ashomer Atsair, kuala kompletamente se asosyasyo a la rezistensya. Ansina dil 1941 stavamos ayudando kon kualo podiyamos. Mas de 600 personas djudiyas stavan organizadas sekretamente. La situasyon de diya en diya stava mas insuportable. Kon los shadayes a los vestidos no podiyamos salir del geto. Los Bulgares, todo los lavoros i ofisyos los difindyeron. Las grutas djudiyas las seraron. Mos aprovesimos. La solidarida entre mozotros se developo lo mas mucho posible. Beviyamos kon una esperanza ke la gera no va turar mucho.

Al invyerno 1943 a la Makedoniya aviya unas kuantas formasyones militantes de la rezistensya. Por el teror terible, estos gerilyos stavan por los kazales, londje de la sivdas. Las relasyones stavan muy flakas. Ansina la manseves organizada no se podiya adjuntar. A lassivdas, la mas grande parte di la organizasyon sekreta stava denonsada. Muchos membros, los Bulgaros los emprezonaron o los mataron.

Žamila Kolonomos (al centro) con luchadores del destacamento Dame Gruev en Macedonia durante la Segunda Guerra Mundial. Estreya Ovadya aparece en la segunda fila a la derecha.

Al 9 marzo 1943 un fonksioner de la rezistensya, Borche Milyoviski me konsejo de no me echar en kaza estos diyas de ke no se save lo ke pensa la polisiya. Me dyo el adreso onde me vo skonder, pasar la noche.

Favli kon mi padre “Parese ke devemos de ir de en kaza, mos eskonder” le dishe. “No podemos, kreyo ke no se tyene de menester. No la puedo deshar a mi madre ke sta atada a la kama. Los Bulgaros dizen ke van a tomar solo los mansevos ke pueden lavorar. Kalef i Menahem no tyenen 18 anyos, Rachel es chika tyene tredje anyos, tu se kere ke te skondes”. El ya saviya ke lavoro por la rezistensya i no me faziya ninguna difikulta.

Il adreso ke me daron era un kiosko onde se vendiya sigaros. Stava mucho serka de la polisiya. Il patron era invalido, kon una pyerna. Se yamava Bogoya Silyanovski, dekorado kon “Tsaduke Aolam” de Yad Vashem. Me arisivyo i presto sero il kiosko. La noche paso kalma, lamanyana yo me atorni en kaza. Todos los Djidyos stavan en penseryo, no savyendo lo ke va ankuntiser. Si echavan a la kama vistidos, kon las luzis avyertas. Mi padre si akonsijo ke apareje a todos una mudadura, ki si tope…

Arisinti la kaza, fizi komer fijonis, la nona la lavi i li di a komer. À todos apareji un bugito kon mudadura, kaltsas i unos kuantos biskochos. Pinsando ke a la manyana di muevo vo atornar no me saludi kon ninguno i no tominada para mi. A pena se skurisyo, la tomi kon mi EstelaLevi i mos fuemos al kiosko. El patron mos sero kon yave la puerta i se fuey.

Una al lado de otra, timblando de yilor, skurina preta, no aviya ventana no se viya nada. No podiyamos dormirpinsando lo ke va trayer el diya. Dispues de medya noche sintimos bozes dezordonadas de la polisiya ke stava muy serka de mozotros. Las patadas de los kavayos i el ruydo de la arabas arumpyeron el silensyo de la noche. Los soldadosi la polisiya bulgara rodearon la sivda. Las oras se alongaron no saviyamos lo ke se sta pasando. À la maniser sentimos komo se stan aserkando bozes. Los gritos, yoros, orasyones de la mujeres i kriyos stavan tanto fuertes ke mos stavamos moryendo de spanto i dolor. Empesimos a yorar, keriyamos salir i aunarmos kon los muestros. Stavamos enseradas. Por el borakito de la puerta no se viya nada, solo komo sta kayendo la nyeve.

El diya entero no vino ninguno. La sivda komo muerta, kayades, ninguno no paso por la kaye. A la noche vino el patron kon tres Djudiyas : Rosa Ruso, Estreya Ovadya i Adela Faradji. Mos dishyeron ke a todos los tomaron, las kazas las siraron i las yaves las tomaron lus de la polisiya. Las yevaron a la stasyon ayi los diznudavan boshkando i tomando las paras, los byenes i todo lo ke les plaziya. Los yevaron kon vagones de bemas a Skopye. Mas tarde vamos asaver komo los posaron al “Monopolo”1 de Skopya.

Sinko Djudiyas guardadas in un kiosko de 3 m2. Una stera mos despartiya del lugar onde se vendiyan los sigaros. Sin komer, sin agua, sin ninguna kondisyon ijienikas, ni una mantika para kuvijar. Asentadas a las tavlas no mospodiyamos manear ni diya ni noche. Los agentes de la polisiya kada diya veniyan a merkar sigaros i kedavan favlar kon el patron. Se sentiya todo, stavamos muy serka. No podiyamos ni favlar ni tuser, ni respirar. Un mes bivimos en estas kondisyones insuportables. Vyendo ke los diyas stan pasando, muchas situasyones riskanteas mos ovligaron de insistir para mos yir lo mas presto posible a la montanya. El syete avril arivimos a realizar la demanda. Los partizanesmos aresevyeron kordialmente. Los Djidyos ke stavan inda del 1942 a la gerila kon mucho kuydo se aserkaron i demandando por los muestros. No saviyamos nada…(Despues de la gera intindimos ke 7148 almas fueron deportados primero a Skopye, al “Monopolo”. Mujeres, vyejos, kriyaturas, hazinos, todos a 400-500 persona in una sala insirados unos inriva de otros. Kuatro diyas sin komer i sin agua. La nesesida si faziya a las skaleras i a las abitasyones. Las ventanas stavan seradas kon klavos. Se stavan afogando de la gulor, sin remedyo.
Komer lis davan a los grandes una vez al diya, a los kriyos dos vezes. Los doktores stuvieron liberados. Los hazinos no teniyan ningun ayudo ni milizina. Unas kuantas personas arivaron a se fuyir del kampo. La kruz korelada no se anonso. À Treblinka fueron deportados in tres grupos. Al 22 marso, al 29 marso i al sinko de avril. De Treblinka no atorno ninguno. Todos fueron matados a los fornos.)

Inda al primer diya a la montanya mos dyeron nombradas. À mi me yamavan “Taveta (Flor). Komo la propaganda bulgara se anchava ke los partezanos son Serbos, Djidyos i komunistas, mozotros mos prezentavamos vlahas. Entre el puevlo aviya fama ke los Djidyos son flakos, floshos i no son buenos gereros. Por esto mos arekojimos los partizanes djidyos i dimos djuro ke vamos a dar toda las fuersas a la gera kontra los fashistas ke mos fezyeron tanto mal. Mos vamos a komportar por egsemplo a todos. Deste modo fuey…

Empeso una vida diferente de todo lo ke teniyamos pasado. Se perdyo el espanto ke kada punto vamos a kayir a las manos de los fashistas ke mos van maltratar i a la fin matar. No se donde mos vino tanta fuersa i kuraje de tiner lasprimeras pozisyones a los kombates. Komo ke keriyamos vensar los keridos muestros, sin saver lo ke les akontisyo.

Kontra mozotros la armada bulgara se auno kon los Almanes i los “Balistas” albanezes fashistas. Los kazales ke mos ayudavan los kemavan, i muchos kazalinos los imprezonavan o los matavan.

Il evyerno 1943-1944 fue terible kon mucha nyeve i tormentas. El fevruaro fuey el mas pezgado. Kinze diyas stovimos arodeados kon armadas aunades enemigas. Grasyas al komandante de la brigada arivavamos a kombatar kon resultado, i topar el kamino para mos desplazar de una montanya a la otra. Komo a los kazalesaviya muchos soldados no podiyamos tomar komer. Fambrentos i kansados sin repozo, los partizanos empesaron a se abatir i embuzizar. Todo el tyempo deviyamos de star kaminando, deke el fryo al punto la “muerte blanka” te yevava. Los alusinasyones no mos mankavan. Unosalongando las manos, kon riza a la fasha, pensando ke se sta kayentando a la lumbre. Otros kortando el sako imajinando ke es pan. Aviya i akeyos ke se stiravan a la nyeve a punto se dormiyan i no se despertavan mas. Me afiro i a mi la mezma hazinura. Delantre de mi stava vyendo kazales, sentiyendo bozes dezagradabiles i komyendo karne asada de koderiko muy savroza.

Inda oy tengo la savor a la boka. Un amigo ke le di nombrada “Salvador” sinko vezes me salvo la vida de segura muerte. Me vido ke sto kedando atras. Por fuersa me tomo la mano i me stava travando ke kamini. Kon mozotros teniyamos unos kuantos Englezes por relasyones kon laaliyansa. Mos dyeron dos pedasikos de asuka i ansina vine en si… El 13 Fevruaro 1944 arivimos in un grande obstaklo. Delantre de mozotros il riyo Tarna Reka (Ryo Preto) mucho avenido. Stava yivando pyedras, tronkos, arvulis. Aviya una puente de kuala los Bulgaros stavan tirando sin apozar. Mos ovligaron de pasar el riyo. Topimos un kazalino ke mos amostro el logar onde el riyo es mas poko fondo. Todos konpenas pasaron detinyendose las manos unos kontro otros. Unos kuantos gerilyos el riyo los engluto i los stavan yevando muy presto. No arivaron a los asalvar. El miyo grupo stavamos bikliyando ke no mos aharve el enemigo de la spalda. Pasaron el riyo los miyos gerilyos. Kedi la ultima sola. Deshidi de pasar. La agua me vino fina la boka i empeso a me travar al fondo. Me atorni… Aki va ser la fin miya ! Pensi de aktivar la bomba ke teniya i me matar. Masbueno morir ke kayir a las manos de los enemigos! A este punto, de la otra parte del riyo se amostro al miyo “Salvador” dando me sinyo ke aspere. Se divistyo, paso el riyo, me tomo a la spalda i me asalvo. Tuvi un grandi trimor, kalyo tyempo para me kalmar.

La nyeve no apuzava de kayir. Onde kaminavamosdeshavamos sinyal a la nyeve i los fashistas mos topavan presto. Il ayre yelado mos imbuzizava los vestidos i se faziyan komo panderos. Tovimos ayuda de otras muestras brigadas. Mos alondjimos in logares mas siguros. Topimos un poko de repozo i mos konfortimos. De la brigada miya kidaron a las montanyas a la nyeve 80 gerilyos. Los perdimos para syempre. No era kolay kada noche koryendo de un logar al otro para inganyar al enemigo ! El diya mos guardavamos al fondo del bosko. Mushas vezes stavamos fambrentos. Mushos daron la vida en esta gera. I muestros mansevos kayeron a los kombates. Los anumbravamos inkada okazyon i no los vamos olvidar ninguna vez. Vo amintar solo unos kuantos :

Estreya Ovadia nomada eroinya Jugoslava, Rafael Batino, Mordehay Nahmiyas, Aron Aruesti, Marsel Demayo, Samuel i Salamon Sadikario, Mois Bahar, Josif Shurna, DavidNavaro i otros. Todos los Djidyos ke tomaron parte a la rezistensya tuvyeron grandes postos a las brigadas i a las divizyones. Yo alkansi fina komesaryo de la 42 divizyon yugoslava. Todos stavamos dekorados kon munchas medalyas.

A la fin de 1944, la Makedoniya ya stuvo libera. Todos alegres ke ya skapo la gera, abrasandose kon las famiyas. Solo los Djidyos amargados in penseryo. No topimos a nenguno, las kazas vaziyas, no teniyamos kon ken i por kualo mos alegrar. No podemos olvidar lo ke pasimos i lo ke pasaron los muestros keridos.

Oy, di muevo geras por todas las partes i al muestro vizindado. Todo se sta repetendo in formas de mas a mas negras. Agora vamos a kombatar para tener pas. Dezeyamos para las jenerasyones ke vyenen ke bivan sin las dolores ketuvimos mozotros i ke no pasen lo ke pasimos.